மட்டன் சுக்கா,ஆட்டுக்கறியைக் கொண்டு செய்யப்படும் ஒரு சுவையான வறுவல். இது பிரியாணி மற்றும் வெறும் சாதமுடன் சாப்பிடவும் அருமையாக இருக்கும். கீழே கொடுக்கப்பட்டுள்ள பொருட்கள் லிஸ்ட்-யை பார்த்து,லிஸ்ட் பெரிசா இருக்கே இதை செய்வது கடினம்னு  நினைச்சிடாதீங்க, மட்டன் வேக வைக்க மற்றும் மசாலா செய்வதற்குன்னு தனி தனியாக பொருட்கள் லிஸ்ட் கொடுத்துள்ளேன், அதனால் லிஸ்ட் பெருசாக இருக்கு,மற்றபடி நாம் கிட்சனில் உள்ள பொருட்களை கொண்டே ரொம்ப சுலபமாக இந்த மட்டன் சுக்கா/வறுவல்-யை செய்துவிடலாம். வாங்க இப்போ எப்படி செய்வதுனு பார்க்கலாம்

மட்டன் சுக்கா | Mutton Sukka

Preparation Time : 10 mins | Cooking Time : 30 mins | Serves : 2 
Recipe Category: Curry | Recipe Cuisine: Indian

தேவையான பொருட்கள்
மட்டன்/ஆட்டு இறைச்சி  - 200 கிராம் 
சின்ன வெங்காயம் - 7 
தக்காளி - 1
இஞ்சி பூண்டு விழுது  - 3/4 டேபிள் ஸ்பூன் 
மஞ்சள் பொடி - 1/4 டீ ஸ்பூன் 
மிளகாய் பொடி - 1/2 டீ ஸ்பூன் 
கொத்தமல்லி பொடி - 1 டீ ஸ்பூன் 
நல்லண்ணெய் -  1/2 டேபிள் ஸ்பூன் 
பட்டை - 1/2 அங்குலம் துண்டு 
கிராம்பு - 2
ஏலக்காய் - 1
கறிவேப்பிலை - 1 கொத்து 
மசாலாவுக்கு தேவையான பொருட்கள் 
பெரிய வெங்காயம் - 1
தக்காளி - 1
இஞ்சி பூண்டு விழுது  - 1/2 டேபிள் ஸ்பூன் 
மஞ்சள் பொடி - 1/8 டீ ஸ்பூன் 
மிளகாய் பொடி - 1/2 டீ ஸ்பூன் 
கொத்தமல்லி பொடி - 1 & 1/2 டீ ஸ்பூன் 
நல்லெண்ணெய் - 1  டேபிள் ஸ்பூன் 
பட்டை - 1/2 அங்குலம் துண்டு 
கிராம்பு - 2
ஏலக்காய் - 1
கொத்தமல்லி இலை - தேவைக்கேற்ப 
உப்பு - தேவைக்கேற்ப

செய்முறை

முதலில் மட்டனை  நன்கு சுத்தப்படுத்தி எடுத்து வைத்து கொள்ளவும். பிரஷர் குக்கரில் எண்ணெய்யை காய வைத்து பட்டை,கிராம்பு மற்றும் ஏலக்காய் போட்டு தாளிக்கவும்.அடுத்து சின்ன  வெங்காயம் மற்றும் கறிவேப்பிலையை போடவும், வெங்காயம் சற்று நிறம் மாறும் வரை வதக்கவும்.அடுத்து மட்டன் ,மற்றும் இஞ்சி பூண்டு விழுதை சேர்த்து நன்கு வதக்கவும்.இஞ்சி பூண்டு விழுது பச்சை வாசம் போனபின் அதில்  மஞ்சள் மற்றும் மிளகாய் பொடி சேர்க்கவும்.தேவைக்கேற்ற தண்ணீர் ஊற்றி மட்டனை ஒரு 5 விசில் வேக விடவும்.அடுத்து மசாலாவுக்கு தேவையான வெங்காயம் மற்றும் தக்காளியை நறுக்கி கொள்ளவும். ஒரு வாணலில் எண்ணெயை காய வைத்து பட்டை,கிராம்பு மற்றும் ஏலக்காய் போட்டு தாளிக்கவும்.அடுத்து நறுக்கிய வெங்காயம் சேர்க்கவும், வெங்காயம் சற்று நிறம் மாறும் வரை வதக்கவும்.அடுத்து  இஞ்சி பூண்டு விழுதை சேர்த்து நன்கு வதக்கவும்.இஞ்சி பூண்டு விழுது பச்சை வாசம் போனபின் அதில் தக்காளியை போடவும்.கூடவே மஞ்சள், மிளகாய், கொத்தமல்லி தூள் மற்றும் உப்பு சேர்த்து கொதிக்கவிடவும், கொதித்த பின் அதில் அவித்த மட்டன்-யை சேர்த்து கொள்ளவும்.மெல்லிய தீயில் வைத்து நன்கு சுருள வைத்தவும். கடைசியாக கொத்தமல்லி இலை சேர்த்து இறக்கவும்.சுவையான மட்டன் சுக்கா தயார்.

குறிப்புக்கள்:

•  நல்லெண்ணெய் மற்றும் சின்ன வெங்காயம் நல்ல சுவையை கொடுக்கும்.
• தேவைப்பட்டால் 1/2 டீஸ்பூன் கரம் மசாலா தூள் சேர்த்துக்கொள்ளலாம்.

Read more »

மைதா பூரி,கோதுமை மாவிற்கு பதில் மைதாவில் செய்யப்படும் இந்த பூரி எங்கள் ஊரில்(திருநெல்வேலி ) பிரபலம். ரொம்ப சுவையான இந்த பூரி கிழங்கு மற்றும் சென்னா மசாலா எப்படி எதனுடன் சாப்பிடவும் அருமையாக இருக்கும். மேலும் கோதுமை பூரி விட இந்த பூரி கம்மியாக தான் எண்ணெயை குடிக்கும், ஆதலால் எங்கள் வீட்டில் கோதுமை பூரியை விட இந்த மைதா பூரி தான் அதிகம் செய்வோம். வாங்க இப்போ இந்த மைதா பூரி எப்படி செய்வதுனு பார்க்கலாம்.

மைதா பூரி | Maida Poori

Preparation Time : 10 mins | Cooking Time : 15 mins | Makes : 8 to 9 
Recipe Category: Breakfast | Recipe Cuisine: Indian

தேவையான பொருட்கள்
மைதா - 1 கப் 
ரவை  - 1 டேபிள் ஸ்பூன் 
எண்ணெய் - 1 டீஸ்பூன் 
உப்பு - தேவைக்கேற்ப 
தண்ணீர் - தேவைக்கேற்ப 
எண்ணெய் - பொரிப்பதற்கு தேவையானளவு 

செய்முறை

முதலில் மைதா,ரவை மற்றும் உப்பை ஒரு பாத்திரத்தில் போட்டு நன்கு கலந்து கொள்ளவும். பின் அதில் 1 டீஸ்பூன் எண்ணெய் சேர்த்து மாவில் நன்கு விரைவி கொள்ளவும்.அடுத்து தேவையானளவு தண்ணீர் சேர்த்து மாவை நன்கு கெட்டியாக பிசைந்து கொள்ளவும்.ஒரு 10 நிமிடம் மூடி வைத்து விடவும். பின் சிறு சிறு உருண்டைகளாக உருட்டி கொள்ளவும். ஒவ்வொரு உருண்டைகளாக எடுத்து கொஞ்சம் தடிமனாக திரட்டி கொள்ளவும்.பொரிப்பதற்கு எண்ணெயை காய வைத்து கொள்ளவும்.எண்ணெயை காய்ந்த பின்(ஒரு சிறு துண்டு மாவை எண்ணெயில் போட்டால் மாவு உடனே மேலே எழுந்து வர வேண்டும் ), திரட்டிய மாவை எண்ணெயில் போட்டு கரண்டியால் மேலே லேசாக அழுத்திவிடவும்.அப்போதுதான் பூரி நன்றாக மேலே எழுந்து வரும்.பூரி நன்கு மேலே எழுந்து வந்த பின், மெதுவாக திருப்பிப்போட்டு அடுத்த பக்கமும் நானு சிவக்க பொரித்து எடுக்கவும்.சுவையான புஸ் புஸ்வென்ற  பூரி தயார்.

குறிப்புக்கள் 

• மாவை நன்றா கெட்டியாக பிசைந்து கொள்ளவும், இல்லையென்றால் அதிகமாக எண்ணெயை குடிக்கும்.
• பூரிக்கு மாவு பிசைந்து அதிக நேரம் ஊற விட தேவையில்லை, ஒரு 10-15 நிமிடத்தில் பூரி செய்து விடலாம்.
• சப்பாத்திக்கு போல் அதிகம் மாவு தொட்டு தேய்க்க வேண்டாம். எண்ணெய் நிறம் சீக்கரம் கருத்து  விடும்.

Read more »

மஷ்ரூம்/காளான் பிரியாணி, சுவையான எளிதில் பிரஷர் குக்கரில் செய்யக்கூடிய ஒரு பிரியாணி. ஒரு 20-25 நிமிடத்தில் செய்யக்கூடிய பிரியாணி இது, அதனால் இந்த பிரியாணி-யை  ரொம்ப ஈஸியாக லஞ்ச் பாஸ்-க்கு  செய்து கொடுத்திடலாம். சைடு டிஷ் என்றும் பெருசாக இந்த பிரியாணிக்கு எதும் தேவையில்லை சிம்பிளா ஒரு தயிர் பச்சடி இருந்தாலே போதும், சூப்பரா இருக்கும். வாங்க இப்போ இந்த சூப்பர் மஷ்ரூம்/காளான் பிரியாணி-யை எப்படி செய்வதுனு பார்க்கலாம்.

மஷ்ரூம் பிரியாணி | காளான் பிரியாணி | Mushroom Biryani

Preparation Time : 10 mins | Cooking Time : 20 mins | Serves : 2 
Recipe Category: Biryani | Recipe Cuisine: Indian

தேவையான பொருட்கள்
மஷ்ரூம்/காளான்  - 200 கிராம்
பாஸ்மதி அரிசி - 1/2 கப்  
வெங்காயம் - 1/2
தக்காளி - 1
பச்சை மிளகாய் - 1 
தயிர் - 1 டேபிள் ஸ்பூன் 
மிளகாய் தூள் - 1/2 டீஸ்பூன் 
மஞ்சள் தூள் - 1/8 டீஸ்பூன் 
இஞ்சி பூண்டு விழுது - 1 டீஸ்பூன் 
புதினா  மற்றும் கொத்தமல்லி  - ஒரு கைப்பிடி 
முந்திரி பருப்பு - 5
பட்டை - 1/2 அங்குல துண்டு 
கிராம்பு - 3
ஏலக்காய் - 2
பிரியாணி இலை - 1
நெய் - 1 & 1/2 டீஸ்பூன்  
தண்ணீர் - 1 கப்
உப்பு - தேவைக்கேற்ப

செய்முறை

அரிசி-யை ஒரு 20 நிமிடம் ஊற வைக்கவும். வெங்காயம் மற்றும் மஷ்ரூம்-யை  மெலிதாக, தக்காளியை சிறு சிறு துண்டுகளாக நறுக்கி  கொள்ளவும். பச்சை மிளகாயை இரண்டாக வகுந்து கொள்ளவும். தேவையான புதினா மற்றும் கொத்தமல்லியை சுத்தப்படுத்தி எடுத்து வைக்கவும்.அடுப்பில் பிரஷர் குக்கரை வைத்து  நெய் ஊற்றி கொள்ளவும். நெய் சூடான பின் பட்டை,கிராம்பு ,ஏலக்காய் மற்றும் பிரியாணி இலையை சேர்த்து ஒரு 30 நொடி வதக்கவும். பின் முந்திரி பருப்பு சேர்த்து கொள்ளவும்.முந்திரி பருப்பு பொன்னிறமாக ஆனபின் வெங்காயம், பச்சை மிளகாய் மற்றும் இஞ்சி பூண்டு விழுது சேர்த்து கொள்ளவும்.இஞ்சி பூண்டு பச்சை வாசனை போனபின் அடுத்து தக்காளி,மஷ்ரூம் மற்றும் புதினா, கொத்தமல்லி சேர்த்து நன்கு ஒரு 2 நிமிடம் வதக்கவும்.வதக்கிய பின் மஞ்சள் தூள், மிளகாய் தூள் , உப்பு மற்றும் தயிர் சேர்த்து ஒரு 2 நிமிடம் வதக்கவும்.அடுத்து தண்ணீரை ஊற்றி அது கொதி வந்த பின் அதில் ஊற வைத்த அரிசியை தண்ணீர் வடித்து விட்டு சேர்க்கவும்.குக்கரை மூடி 3 விசில் வேகவிடவும்.சுவையான மஷ்ரூம் பிரியாணி தயார்.

 குறிப்புக்கள்:

• ப்ரவுன் மற்றும் வெள்ளை எந்த மஷ்ரூம் என்றாலும் பயன்படுத்தலாம்.
• நெய்க்கு பதிலாக எண்ணெயும் பயன்படுத்தலாம் அல்லது பாதி நெய் பாதி எண்ணெயும் பயன்படுத்தலாம்.
• தேவைப்பட்டால் 1/2 டீஸ்பூன் கரம் மசாலா சேர்த்து கொள்ளலாம்.

Read more »

காலிபிளவர் 65, மொறுமொறுப்பான இந்த காலிபிளவர் ஸ்னாக்ஸ் கடையில் கிடைப்பதை போலவே  நம் வீட்டில் ரொம்ப ஈசியாக செய்யலாம். இதை சாதமுடன் சைடு டிஷாக அல்லது ஸ்னாக்ஸ்-ஆகா கூட பரிமாறலாம். எப்படியென்றாலும்  ரொம்ப சுவையாக இருக்கும்.இதற்கு முன்னாடி காலிபிளவர் 65 நீங்க ட்ரை பண்ணி அது எண்ணெயை ரொம்ப குடிச்சு மொறுமொறுவென்று வராத அநுபவம் உங்களுக்கு இருந்துச்சுன்னா,உங்களுக்கு இந்த ரெசிபி ரொம்ப உதவியாக இருக்கும், ஏனென்றால் எனக்கும் அப்படி தான் ஆரம்பத்தில் வந்தது,அப்புறம் ரெசிபியை கொஞ்சம் கொஞ்சமாக மாற்றி பெர்பெக்ட் காலிபிளவர் 65 செய்வது எப்படினு தெரிஞ்சுகிட்டேன்.வாங்க இப்போ எப்படி செய்வதுனு பார்க்கலாம். 

காலிபிளவர் 65 | Cauliflower 65

Preparation Time : 30 mins | Cooking Time : 15 mins | Serves : 2 
Recipe Category: Snacks | Recipe Cuisine: Indian

தேவையான பொருட்கள்
காலிபிளவர் - 1 & 1/2 கப் 
தயிர்  -1/4 கப் 
இஞ்சி பூண்டு விழுது - 1 டீஸ்பூன் 
மிளகாய் தூள் - 1/2 டீஸ்பூன் 
மஞ்சள் தூள் - 1/4 டீஸ்பூன்  
கரம் மசாலா தூள் -1/2 டீஸ்பூன் 
உப்பு - தேவைக்கேற்ப 
சிவப்பு கலர் - 1 சிட்டிகை 
லெமன் ஜூஸ் - 1 டீஸ்பூன் 
சோள மாவு - 3-4 டேபிள் ஸ்பூன் 
கறிவேப்பில்லை - 1 கொத்து 
எண்ணெய் - பொரிப்பதற்கு தேவையானளவு 

செய்முறை

முதலில் காலிபிளவர்-யை சிறு சிறு துண்டுகளாக எடுத்து நன்கு கழுவி தண்ணீரில்லாமல் ஒரு கிட்சன் பேப்பரில் போட்டு எடுத்து வைத்துக்கொள்ளவும். அடுத்து ஒரு பாத்திரத்தில் தயிர்,மிளகாய் தூள்,மஞ்சள் தூள்,உப்பு,இஞ்சி பூண்டு விழுது,சிவப்பு கலர்  மற்றும் லெமன் ஜூஸ் சேர்த்து நன்கு கலந்து வைத்து கொள்ளவும்.அதில் காலிபிளவர்-யை போட்டு நன்கு  கலந்து ஒரு 1/2 மணி நேரம் ஊற விடவும்.பொரிப்பதற்கு முன் சோள மாவை காலிபிளவர்-வுடன்  சேர்த்து நன்கு கலந்து கொள்ளவும்.பொரிப்பதற்கு தேவையான எண்ணெயை காய வைத்து, காலிபிளவர்-யை போட்டு நன்கு மொறுமொறுவென்று பொரித்து எடுக்கவும்.கடைசியாக கறிவேப்பில்லை-யை எண்ணெயையில் பொரித்து காலிபிளவர்-வுடன் கலந்து கொள்ளவும்.சுவையான காலிபிளவர் 65 தயார்.

குறிப்புக்கள்:

• நன்கு கெட்டியான தயிரை பயன்படுத்தவும்.
• முதலில் 3 டேபிள் ஸ்பூன் சோள மாவை காலிபிளவர்-வுடன் சேர்த்து பொரித்து பார்க்கவும். நல்ல கிரிஸ்பாக வரவில்லை என்றால் கூட  1 டேபிள் ஸ்பூன் சோள மாவை சேர்த்து கொள்ளவும்.

Read more »

ஸ்ட்ராபெர்ரி ஸ்மூத்தி/மில்க் ஷேக் , சுலபாக செய்யக்கூடிய ஒரு சுவையான ஸ்மூத்தி/மில்க் ஷேக். இந்த மில்க் ஷேக் செய்வதற்கு மொத்தமே 3 பொருட்கள் ஸ்ட்ராபெர்ரி,பால் மற்றும் தேன்/சர்க்கரை ஆகியவை தான் தேவை.எல்லாவற்றையும் ஒன்றாக சேர்த்து மிக்ஸில் அடித்ததால் போதும், உங்கள் ஸ்ட்ராபெர்ரி ஸ்மூத்தி/மில்க் ஷேக் நொடியில் தயார். தேவைப்பட்டால் ஒரு ஸ்கூப் ஸ்ட்ராபெர்ரி ஐஸ்கிரீம் இதனுடன் சேர்த்துக்கொள்ளலாம்,அது இன்னும் சுவையை கூட்டும். வாங்க எப்போ இந்த  ஸ்ட்ராபெர்ரி ஸ்மூத்தி/மில்க் ஷேக் எப்படி செய்வதுனு பார்க்கலாம்.

ஸ்ட்ராபெர்ரி ஸ்மூத்தி/மில்க் ஷேக் | Strawberry Milkshake/Smoothie

Preparation Time : 5 mins | Cooking Time : 0 mins | Serves : 2 
Recipe Category: Drinks | Recipe Cuisine: International

தேவையான பொருட்கள்
ஸ்ட்ராபெர்ரி - 100கிராம் 
பால் - 1/2 - 3/4 கப் 
தேன் - தேவைக்கேற்ப 

செய்முறை

முதலில் ஸ்ட்ராபெர்ரி-யை நன்கு கழுவி,சிறு சிறு துண்டுகளாக நறுக்கி கொள்ளவும். அதை ஒரு மிக்ஸி ஜாரில் போட்டு, பாலையும் சேர்க்கவும்.அடுத்து தேவையானளவு தேனை சேர்த்து மிக்ஸில் நன்கு அடித்து கொள்ளவும்.அவ்வளவுதான் ஸ்ட்ராபெர்ரி ஸ்மூத்தி/மில்க் ஷேக் தயார்.

குறிப்புக்கள் :

• ஸ்மூத்தி திக்காக வேண்டுமென்றால் 1/2 கப் பால்  சேர்க்கவும் இல்லையெனில் 3/4 கப் பால் சேர்த்து கொள்ளவும்.
• சூடு பண்ணி நன்கு ஆறவைத்த பாலை பயன்படுத்தவும்.
• தேனுக்கு பதில் சர்க்கரையும் சேர்க்கலாம்.

Read more »

தக்காளி தொக்கு, சுவையான இந்த தொக்கு இட்லி,தோசை,சப்பாத்தி மற்றும் சாதம் எப்படி எதனுடன் சாப்பிடவும் அருமையாக இருக்கும். தக்காளி மலிவாக கிடைக்கும் சமயங்களில் இதை செய்து வைத்துக்கொண்டால் வார கணக்கில் பயன்படுத்திக்கொள்ளலாம். அதுமட்டுமின்றி இந்த தக்காளி தொக்கு பயணங்களில் எடுத்து செல்ல ஒரு சிறந்த உணவு, சீக்கரம் கெட்டுப்போகாமல் நன்றாக இருக்கும்.வாங்க இப்போ இந்த சுவையான தொக்கை எப்படி செய்வதுனு பார்க்கலாம்.

வீடியோ ரெசிபிக்கு  கீழே பார்க்கவும்.

தக்காளி தொக்கு | Tomato Thokku

Preparation Time : 10 mins | Cooking Time : 20 mins | Makes : 1 cup 
Recipe Category: Accompaniment | Recipe Cuisine: Indian

தேவையான பொருட்கள்
தக்காளி - 4
பூண்டு - 6
எண்ணெய் - 1 டேபிள் ஸ்பூன் 
கடுகு - 1/4 டீஸ்பூன் 
கறிவேப்பில்லை - 1 கொத்து 
மிளகாய் தூள் - 1 டீஸ்பூன் 
மஞ்சள் தூள் - 1/4 டீஸ்பூன் 
உப்பு - தேவைக்கேற்ப 
வெல்லம் - 1 டீஸ்பூன் 
வெந்தய பொடி  -1/4 டீஸ்பூன் 

செய்முறை

முதலில் தக்காளியை பொடியாக நறுக்கி கொள்ளவும். அடுத்து பூண்டை தோல் உரித்து எடுத்து  கொள்ளவும். பூண்டையும் பொடியாக நறுக்கி கொள்ளவும். ஒரு மிக்ஸி ஜாரில் தக்காளியை மட்டும் போட்டு நன்கு நைசாக அரைத்து கொள்ளவும்.ஒரு வாணலியில் எண்ணெய் ஊற்றி, சூடான பின் கடுகை தாளித்து கொள்ளவும். அடுத்து பூண்டு மற்றும் கறிவேப்பில்லை சேர்த்து கொள்ளவும்.பூண்டு நன்கு வதங்கிய பின் அதில் அரைத்த தக்காளியை சேர்த்து கொள்ளவும்.கூடவே மஞ்சள், மிளகாய் தூள் மற்றும் உப்பு சேர்த்து நன்கு கலந்து கொள்ளவும்.நன்கு கொதி வந்த பின் மூடி வைத்து மெல்லிய தீயில் சுருள வரும் வரை விடவும். இடையில் அடிபிடிக்காமலிருக்க அடிக்கடி கிளறி கொள்ளவும்.கடைசியாக வெல்லம் மற்றும் வெந்தய தூள் சேர்த்து எண்ணெய் பிரிந்து வரும் வரை தொக்கை வதக்கவும்.சுவையான தக்காளி தொக்கு தயார்.

குறிப்புக்கள் 

• சிறிய பூண்டாக இருந்தால் நறுக்காமல் அப்படியே போட்டு கொள்ளலாம்.
• பிரிட்ஜ்-ல் 2 வாரம் வரை இந்த தொக்கை வைத்து கொள்ளலாம்.

Read more »